EP23 台語報你知 | 500萬雨傘

「500萬雨傘」毋免開500萬！

佇咧1980年，逐家對保險的觀念無仝，認為彼是一个較無必要的物件。
為著欲予民眾閣較了解保險的重要性，一間保險公司就決定拍一支予人印象真深的廣告。
佇彼个廣告內底，一對翁仔某𤆬兩个囝仔徛咧淋雨，
𪜶上頭仔攑的雨傘頂懸寫「10萬」，毋過因為傷小支，規身軀沃到澹漉漉。
換一支「30萬」的了後，遮閘的效果猶是有限。
一直到頂頭寫「500萬」、上大支的雨傘出現，
規家伙仔才真正有保障。

落尾，逐家就共特別大支的雨傘號做「五百萬」。