熱天補水我相信很多人日常生活的選擇不是白開水而是含糖飲料，有些人說「喝太多飲料，當心以後會得糖尿病」真的是這樣嗎？請醫師跟大家介紹什麼是糖尿病？
糖尿病uì伊的名就知影伊是一種尿內底有糖的病，正常來講尿內底無應該有糖，我捌拄過一个出世6個月案例，是因為尿苴仔包起來猶未擲掉，發覺哪會一陣狗蟻咧爬。尿內底有糖就是這个病的一種表現，想看覓做鹹酸甜共梅仔浸佇糖水內，糖份會走-入去，水份會逼-出來，梅仔看-起來會攝攝、脯脯，咱的細胞組織器官泡佇糖水，會受損蕩嘛是差不多的道理。血糖一開始夯懸，尿糖猶未綴咧出現，每一个人無仝，差不多佇血糖180mg/dl的時陣，尿就開始出現糖。
Q1糖尿病是身體佗位出問題？
A1想看覓一間公司若工課效率開始變䆀抑是穡頭變濟，第1步應當是操勞加班，共代誌仝款做予了，第2步加班仝款做袂了，穡頭愈積愈濟，上嚴重閣會罷工。腰尺就是咱的員工，伊會分泌一種hoo-lú-bóng號做胰島素，控制血糖就是伊的穡頭，降血糖的功能若開始相對不足若像工課效率開始變䆀抑是穡頭變濟，一開始血糖猶未懸就是代誌做會了，血糖若開始夯懸表示穡頭愈積愈濟囉。
Q2.這個病大概每個人都耳熟能詳，台灣有偌濟人有糖尿病？偌濟人有治療？
A2.台灣這馬平均10个人就有1个人有糖尿病，其中超過3成个人無注意著抑是知影毋過無當做一回事。毋但是人數濟，論病來講糖尿病佔台灣健保支出是第二名喔，所以咱一定愛好好仔來了解面對糖尿病的相關議題，加減會拄著身軀邊有需要的人。拄進入糖尿病，其實腰尺功能平均就賰50pha̋-siàn-tooh，所以治療上好是閣較早就開始。
Q3.前面講到進入糖尿病時胰臟功能已經剩50%，而且一開始也不一定有症狀，所以要及早偵測及早預防，那麼在有症狀之前，啥物族群愛特別注意糖尿病？建議啥物人需要篩檢？
A3.根據美國預防服務工作小組，超重、大箍是上強的風險因子，其他的風險因素有年歲較大、家族病史、有身的糖尿病、多水疱卵巢症候群、食食佮生活方式無適合。針對35-70歲閣超重的人做糖尿病的篩檢是有意義的，冗早掠出糖尿病前期的人採取行動。
Q4.有甚麼症狀要警覺到自己可能有糖尿病？
A4.3濟1少：食濟、啉濟、尿濟、體重減少。啉濟、尿濟算一組，因為血糖懸、血較厚，會喙焦想欲加啉水，尿綴咧濟。食濟、體重減少算一組，因為血糖無法度好好仔利用，所以體重變輕，咱的身體會感覺是食無飽想欲加食。
Q5.有什麼管道可以篩檢？
A5.有3條路。台灣多數食人頭路，會使靠政府規定公司愛辦理的勞工體檢。所有40歲以上的百姓、35歲以上的小兒麻痺患者，會使靠國民健康署全公費補助成年預防保健，血糖是基本項目。若是身軀邊有血糖機，嘛聽好自我篩檢，下早仔空腹鑿一針，血糖超過100就愛閣看醫生。
Q6.治療的方法有哪些？
A6.藥仔佮飲食調整。藥仔有幾若種，機制攏無仝會使疊起去，上方便當然是用食-的，若控制無好，劑量就愛加起去，無，就是加無仝種的藥仔；另外就是注射，較早干焦胰島素，近年藥仔一直新出，每一兩冬就有大進展，治療的武器愈來愈濟，嘛愈來愈方便，毋免逐工注。過去逐家攏會認為一定是食藥仔控制袂好才注射，是因為無方便加上低血糖的風險，共注射下佇較後壁的選擇，毋過新的研究佮觀念是針對個體差異做無仝的選擇，有的人冗早注射會閣較好喔！
Q7.若沒好好控制，後遺症是甚麼？
A7.糖尿病的病尾是多面向的，主要是影響著血管，大細條血管攏相𫝛，細條影響目睭視網膜、腰子，控制無好會青盲、洗腰子，大條影響腦部、心臟，中風、心梗窒風險較懸。手尾跤尾神經變鈍、感覺變䆀。初期是跤的空喙僫好，若處理無好勢愛切跤。
Q8.回到一開始的問題，「喝太多飲料，當心以後會得糖尿病」是真的嗎？飲食方面要注意甚麼？
A8.看起來敢若是真的，根據一份2010年超過30萬人的統計，逐工啉超過一杯含糖飲料，得著糖尿病的風險比無啉飲料的人加26pha̋-siàn-tooh。食偌濟糖是總量的問題，愛控制，猶閣有啥物種糖的問題，有的糖吸收緊、血糖衝懸，有的糖勻勻仔升血糖，升血糖較慢的糖負擔較低。
簡單做個總結？
有症頭的人緊看醫生；無症頭、較有風險的人做篩檢，真簡單袂複雜。毋管有病無病、風險懸低，盡量莫定定食予血糖衝懸速度較緊的食品造成腰尺累積的操勞，就會使久久長長。