時間：180年9月23日
地點：封閉區域Area DB Island α島
達：（讀白）「蛇變」後嘅凱安變成半人半魚嘅形態，佢要挑戰盧氏村長嘅地位，希望擊敗佢地，接替今敏成位啞鈴洲掌權嘅人。白烏鴉盧地企出嚟同佢對戰，憑渡靈者嘅能力佔盡上風，更斬斷凱安雙手，但凱安竟然可以生出由七腮海鰻組成嘅手臂，更可以利用七腮海鰻發電嘅能力，揮出電拳打暈盧地...
凱安：再見啦，盧地。
達：（讀白）凱安更用口咬落盧地嘅頸到！
*羽毛箭聲效
黑烏鴉盧天：快啲放開我細佬！
達：（讀白）黑烏鴉盧天射出羽毛箭，而有全知狀態嘅凱安用口撕開盧地頸上嘅肉之後，盧地嘅鮮血不斷流出！凱安邊咀嚼盧地嘅肉，邊手捉住佢條頸，用佢嘅身體擋住黑烏鴉盧天嘅羽毛箭攻擊！
*羽毛箭插肉聲效
凱安：好啊，比返嗰細佬你囉～
*墜地聲效
達：（讀白）凱安佢隨手將盧地向前掟落地...盧天快速跑過去抱實盧地！第一世係佢地父母嘅盧零及盧如都趕到！
黑烏鴉盧天：細佬！你醒下啊！細佬！
盧葦/零：小天...地仔佢...已經無咗呼吸同心跳...
今敏：哎喲～當時無諗過渡靈者都會死添，不過你唔駛擔心，佢嘅靈魂都可以去轉世中途島度再轉世嘅～
凱安：盧氏嘅後人仲有4個。你地邊一個上先啊？定睇完盧地戰敗之後，想一齊上？我唔介意架～一齊嚟，快啲完結，啞鈴洲就可以快啲重新出發！
*手指郁動聲效
盧婷/如：你地睇下！地仔嘅手指有反應啊！而佢條頸嘅傷口無再流血，仲慢慢埋口！
盧葦/零：係喎！我仲聽到微弱嘅心跳聲同呼吸聲！地仔！你應下我地啦！
黑烏鴉盧天：但係...細佬佢嘅眼白慢慢變黑...依家...兩隻眼都全黑啊！
白烏鴉盧地：盧...天...
黑烏鴉盧天：細佬！你...做...咩...啊...
盧葦/零：地仔！你快啲放開你家姐啊！
達：（讀白）盧地傷口癒口，眼睛變成全黑，完全聽唔到任何人講啲說話，失去理性同控制咁捉實佢家姐盧天條頸，然後慢慢企咗起身！秤起咗盧天！盧葦同盧婷好想拉開盧地！但由於佢地兩個只係青年人嘅身形，力氣唔夠成熟嘅盧地鬥！
凱安：盧地，同我殺咗盧天。啊～唔好，將盧天變成我地嘅同類！
盧婷/如：地仔！你快啲停手啊！
*羽毛箭聲效
達：（讀白）半黑半白羽毛箭趕到！快速插實盧地手指及手腕關節！盧地即刻鬆手，盧天跌落地面！
黑烏鴉盧天：咳...咳...咳...細佬...你醒下...
凱安：盧地，攻擊！
達：（讀白）盧地好似完全比凱安聲控咁，一拳打去盧天塊面度！
*擋格聲效
達：（讀白）半黑半白羽毛化成羽毛盾，硬擋盧地嘅一拳！而控制半黑半白羽毛嘅就係盧綠！
盧綠：今敏！盧地究竟點解會變成咁嘅！？
今敏：感染囉～凱安基因變異之後除咗變成半人半魚形態，睇嚟食完唔同物種就可以得到嗰個物種嘅能力～估唔到仲可以感染以及控制埋其他人添～
白烏鴉盧地：目標人物 - 盧天；指令 - 同化。
達：（讀白）盧地講完之後，就好似一個無靈魂嘅人偶，目無表情咁向盧天揮拳攻擊！盧天用黑羽毛組成嘅盾去擋格！
*擋格聲效
*羽毛箭聲效
達：（讀白）盧地仲有控制羽毛嘅能力，所有白色羽毛升起，全方位攻向盧天！盧天唔想傷害自己細佬，所以佢就控制黑色羽毛對抗！由於佢地兩個都有全知狀態，所以互相感應到對方羽毛箭攻擊嘅位置！頓時間眼前二人嘅範圍好似落緊一場黑、白羽毛箭雨！每當盧地用白色羽毛箭攻向盧天，盧天就會用黑色羽毛箭抵擋！黑白烏鴉互相比鬥羽毛箭嘅控製力！白色羽毛箭時高時低，忽左忽右，希望可以突破盧天嘅防線，但盧天亦都成為波靈者多年，所以兩個人暫時平分秋色，不分上下！除咗海量嘅黑白羽毛箭較勁，我亦不斷聽到尖銳嘅箭矢碰撞聲！
*羽毛箭雨碰撞聲效
達：（讀白）突然間，盧地將所有羽毛箭收喺胸前，暫援攻勢...
黑烏鴉盧天：細佬！你醒下啊！我係你家姐盧天啊！你係盧零、盧如嘅仔，第三任村長以及波靈者盧地！我地約好一齊管理呢個啞鈴洲架！
白烏鴉盧地：無錯。我同化咗你，就可以一齊協助海神。
盧葦/零：海神？
凱安：係我啱啱諗到架。我成為海神管理大海，盧地成為地主管理啞鈴洲，盧天就做天公負責天空。天、地、海，每人一個區域，但全部都聽命於我。呢個計劃你地覺得點啊？
白烏鴉盧地：目標人物 - 盧天；指令 - 同化。
*揮劍聲效
達：（讀白）盧地將白色羽毛組成兩把短劍，快速舞動攻向盧天！而盧天亦控制黑色羽毛組成一支雙頭羽毛槍！揸真中間嘅槍柄，不斷揮動擋格！
盧綠：盧天！等我嚟幫你！
黑烏鴉盧天：唔駛！等我牽制細佬！你同阿爸阿媽對付失常嘅凱安！
盧葦/零：無錯！凱安係源頭，唯有解決佢，地仔先可以回復正常！
凱安：正常？我依家好唔正常咩？
盧綠：阿安！不如我地再好好傾下啊！
凱安：阿綠，係我細聲定你耳仔有問題啊？咁我講多次 - 你地逐個嚟，定一齊上啊！
盧綠：阿安！我地幾個打完...就決定啞鈴洲嘅命運？會唔會太兒嬉？對其他村民唔公平呢？
凱安：咁你地盧氏世襲制成為村長咁多年，又公唔公平啊！
盧葦/零：係我唔好！將守護真相嘅重任交比自己嘅後人...但我都係唔係其他村民要背負咁大嘅責任啫！
凱安：得啦，唔駛再講。我贏咗，歷史就可以改寫。一切重新嚟過！
盧綠：阿安！
凱安：阿綠，一係我依家即刻返去啞鈴洲，咬曬所有村民，將佢地變為我嘅同類，咁到時我有晒佢地嘅授權，再同你地打，你地嗰心會唔會舒服啲啊～
今敏：盧綠，人類多年歷史以嚟都避唔開戰爭，好多時都係少數有權力嘅人去決定大多數平民嘅命運。你應該慶幸你可以企係呢度成為權力嘅少數。
盧婷/如：Zero…估唔到入到嚟都係要戰鬥...
盧葦/零：阿安，對唔住啊！
盧綠：阿葦！我幫你！
盧葦/零：阿哥，呢件事因我同Fish而起。交比我地去處理啦。
凱安：哈哈哈～阿葦、婷婷，雖然你地第一世係盧零同盧如，但你地睇下你地依家嘅身體？我未「蛇變」之前，你地都唔夠我打，你唔係諗住依家可以贏到我啊嘛！
盧葦/零：阿安，既然你咁講，我想向今敏提出一個要求。
今敏：係咩呢？Zero？
盧葦/零：將我同Fish變返入嚟封閉區域前，對打前組長N嘅身體狀態。阿安，你唔反對啊嘛？
凱安：最緊要你地輸得心服口服！
今敏：OK～既然雙方都同意，咁我唔會阻止嘅～
*魔幻聲效
盧綠：今敏揮一揮手上嘅木棒，阿葦同婷婷身上就被白光圍住，覆蓋全身！唔駛一分鐘之後，啲光散開晒...跟住喺我面前出現嘅...唔再係阿葦同婷婷...而係啞鈴洲創世記憶入面嘅盧零同盧如...佢哋換咗唔屬於啞鈴洲嘅衫...手上拎住嘅亦係我未見過嘅武器...
*上彈聲效
盧婷/如：對上一次拎槍...已經係142年前嘅事啦...
盧綠：槍...?
盧葦/零：係現實世界嘅武器。刀、劍、箭等等冷兵器之後出現嘅武器，算係改變戰爭歷史嘅發明。
今敏：Fish擁有返入封閉區域前，打咗DNA藥嘅狀態。至於Zero你～當係我比你嘅禮物～我還原咗潛藏喺你身體入面嘅DNA。至於係咩，等你慢慢發掘啦～
凱安：唔好咁多廢話！嚟啦！
*充電聲效
達：（讀白）凱安一講完，由七腮海鰻組成嘅右手發電！電流流入三叉戟！凱安大叫一聲！將充滿電流嘅三叉戟向盧零掟過去！
*凱安大叫＋掟戟聲＋電流聲
達：（讀白）盧如瞳孔收細，眼亦比平常人較為凸出！根據我之前所睇嘅檔案，佢本身係擁有深海魚類 - 斑馬魚嘅視桿性視錐細胞，同埋鳥類眼睛雙重調節嘅能力...所以眼力非常好！但盧零本身有咩動物嘅DNA…我就真係唔清楚...
*開槍聲效
達：（讀白）凱安掟出電流三叉戟嘅同時，盧如向三叉戟開咗三槍！精準咁命中三叉戟嘅頭同柄！發出眩目嘅火光！子彈嘅衝力改變咗三叉戟嘅路線，按路線應該飛去盧零幾米外嘅空地！凱安眼見攻擊落空，即刻飛出食指嘅七腮海鰻！喺三叉戟落地前咬實佢，再借拉扯之力，將自己拉近到盧零一米嘅位置！
*開槍聲效
達：（讀白）有全知狀態嘅凱安反應極快！配合非常柔軟嘅身體，凌空做出類似瑜珈嘅身體動作避開盧如嘅子彈！而就係落地嗰一刻，凱安又用充滿電流嘅三叉戟刺向盧零！
*羽毛箭聲效
*武器交擊聲
盧綠：阿葦！接劍！
達：（讀白）盧綠複製盧天同盧地嘅做法，將黑白羽毛形成一把羽毛劍！劍身同三叉戟相撞！火花四散！
盧綠：我會盡力控制羽毛劍嘅形態！唔會被啲電震散！
凱安：阿綠，你都將幾多事架喎！啊！
*飛蛇聲效
達：（讀白）凱安伸長左手！企圖用七腮海鰻攻向盧綠！盧綠雙手緊握，用盡所有精神控制羽毛劍嘅形狀！而盧零就握劍一斬！
*斬擊割肉聲效
*凱安痛叫
盧葦/零：阿安！你嘅對手係我啊！
達：（讀白）盧零斬斷凱安攻向盧綠嘅左手！五條七腮海鰻脫離凱安左手嘅時候，竟然仲有行動能力，繼續走向盧綠腳前！
*開槍聲效
達：（讀白）盧如連開五槍，精準咁擊中甩出嚟嗰五條七腮海鰻！令盧綠暫時脫險！
*手部復原聲效
*揮劍及擋格聲效
達：（讀白）凱安即刻生出左手，而右手就輕鬆揮動三叉戟同盧零嘅羽毛劍對打！盧零揮劍嘅速度越嚟越快！展示出666組織成員應有嘅戰鬥力！斬、刺、劈向種擊法同角度應有盡有！快到凱安無時間幫三叉戟充滿提高攻擊力！跟住盧葦右手握住黑白羽毛劍並收喺左腹位置，曲膝，左腳踏前，做出拔刀術嘅姿勢！由左至右橫斬過去！凱安雙手揸實三叉戟！企圖用柄接呢一招！
盧葦/零：阿哥！一分為二！
盧綠：知道！
達：（讀白）盧綠緊握嘅雙手分開！黑色羽毛喺劍中分離！盧零右手橫斬嘅黑白長劍變成純白短劍，黑色羽毛快速聚集喺盧零空出嘅左手！變成一把純黑色嘅短劍！依家盧零雙手同時握住羽毛劍！右手橫斬，被凱安三叉戟擋住！但呢一下係虛招！係假動作！真正殺著係左手直刺去凱安心口嘅黑羽毛短劍！
*劍插聲效
*凱安痛叫
達：（讀白）凱安被盧零嘅劍刺中！不過由於只係得黑色羽毛，數量同硬度唔足夠刺穿凱安嘅左胸！凱安雖然痛叫咗一下，但佢好快就發出笑聲！
*凱安奸笑聲
*電流聲效
*揮拳聲效
達：（讀白）凱安左拳充滿電流！拉後橫掃落盧葦面前！如果中拳！盧零應該會同盧地同一樣被電暈！
*開槍聲效
*凱安痛叫
達：（讀白）盧如不停咁向凱安對眼開槍！凱安雙眼中槍！令佢出左拳擊空！盧零把握機會！左右手同時出劍！準備瘋狂刺向凱安！而凱安佢向天狂叫！
*凱安狂叫
*超大電流聲效
達：（讀白）凱安身上發出奪目嘅白光！兼釋放出比之前出拳更強嘅電流！猶如神話入面嘅雷神駛出電擊一樣！盧零即刻跳後幾米避開！盧如、盧綠走到佢身旁，遙望住放完電嘅凱安。
同一時間，被凱安操控嘅盧地同盧天繼續不分上下，但兩人各自射出羽毛箭雨嘅速度有所雨降，證明兩個人都漸露疲態...
凱安：一打三...不如二打四啊！盧地！過嚟！
達：盧地聽到指令之後，就即刻放棄攻擊盧天，衝過去同凱安匯合。凱安雙眼慢慢癒合，將喺身體入面嘅子彈迫落地。
*子彈落地聲效
凱安：唔知呢一招你地又會點應付呢！
達：（讀白）凱安突然消失喺大家面前！
Zip噏劇場 Game of Eden 第二季 小島篇 第106回「島局（3）」
阿攝 飾演 阿達
CFun 飾演 盧綠
鄧添樂 飾演 盧葦及盧零
Crystal 飾演 盧婷及盧如
Kity 飾演 黑烏鴉盧天
小白 飾演 白烏鴉盧地
Ant 飾演 今敏
Potter 飾演 凱安
編劇及製作 阿攝
音樂 BEAT FRIDAY (EXTENSION, Good Plus, Inerval, CONVENANT, SOMEWHERE, Kaji)
封面設計 Followmelikeblack
Leave a comment and share your thoughts: https://open.firstory.me/user/ckyhgwclu0xlr08721i22wc7k/comments
